曲奇出爐

叮噹! 叮噹!
大清早樹熊皇宮既門鐘就響起來了。熊爸爸去開門，但係門口無人，佢以為有人係度玩門鐘，就無理佢, 然後走番去睇佢既財經雜誌 。
咯咯! 咯咯!
過左無幾耐，又聽到敲門聲。今次樹熊媽媽又走去開門睇睇，但係都唔見門口有人喎。
咯咯! 咯咯!
再一次又有敲門聲。樹熊媽媽都以為係有人係度玩，所以都唔理囉，但係Goofy就好八卦咁走左去開門喎。Goofy一開門，就大叫"媽媽! 門口出面有熊啊!"
樹熊媽媽聽到門後面有隻熊，就立即出去睇下乜野一會事。原來，係門後面有一隻BB熊坐左係地下，由於佢太矮，所以熊爸爸同樹熊媽媽開門都見佢唔到。但係Goofy同佢一樣高就見到佢啦。　呢隻熊，就係當日樹熊媽媽一個人係屋企無野做，係塘鵝網訂番黎既仔仔啦。　剛剛塘鵝叔叔放低左佢，按左門鐘之後就飛走左。得番佢一個坐係門口等，到熊爸爸開門見佢唔到，佢唯有自己再拍門囉。但係樹熊媽媽又見佢唔到，所以先有一個門鐘同兩下拍門聲。好彩Goofy八卦咋，唔係佢就慘慘囉，唔知要坐到幾時先可以入屋。

樹熊媽媽好開心咁抱左熊BB入屋, 第一時間就帶佢去比熊爸爸睇啦。　因為熊爸爸仲未知道自己會突然多左個BB既。　熊爸爸一知道樹熊媽媽原來當日係訂左個BB, 嚇左一大跳, 不過佢都一樣好開心, 因為呢個BB太似佢啦. 又可愛小小，又有型小小。熊爸爸仲話要快Ｄ同BB改個名添...

熊爸爸話要叫BB做Tiramisu, 樹熊媽媽話太煩啦,叫Cookie簡單D。所以，經過熊爸爸同樹熊媽媽既最後投票，以一比一決定左BB以後就叫曲奇啦!! (點解一比一都係樹熊媽媽贏既?)

終於,曲奇出世啦!!

曲奇當然好開心啦，樹熊媽媽同熊爸爸就更開心。　不過最開心既，就係Goofy啦, 因為, 由於多左個新細佬, Goofy終於兩歲啦!!!!! 佢下次可以參加樹熊運動會了!

樹熊王國運動會

樹熊媽媽一早就比細細Pooh嘈醒左了。佢好開心咁同樹熊媽媽講，佢話佢既日本成功咁申辦左2020年既奧運會啊。
訓係樹熊媽媽身邊既Goofy聽到，就諗起佢四年前去參加樹熊王國運動會既情況...
樹熊王國運動會，簡稱樹運會，亦都係四年一度既體壇盛事。比賽項目雖然沒有奧運會咁多，但係都吸引到所有樹熊王國子民既興趣。
上一屈樹運會就係四年前舉行了。Goofy當年興緻勃勃咁去參加比賽，佢先去到大會登記處，準備遞交左比賽申請表格之後，就番屋企等待比賽當日既來臨。點知，大會既工作人員同佢講，話佢只係得一歲，唔符合大會既比賽資格，無辦法比佢出賽，叫佢大啲再黎過。無辦法啦，Goofy唯有失望地番屋企等下一次樹運會再去參加啦。
終於，兩星期後又係樹熊運動會了。Goofy好積極咁練習，日日係度做sit up，諗住以最好既狀態去贏番一兩個金牌番黎送比樹熊媽媽。佢準備參加既比賽項目係十米短跑同埋速度入睡比賽。　今年十米短跑既大熱門就係上屆既冠軍龜龜同亞軍兔姨姨. 而今年速度入睡既超級大熱門當然就係兩屆金牌得主熊爸爸了。面對住咁強勁既對手，Goofy一定要加陪努力練習。同時間, Goofy亦都已經叫爸爸幫佢填好今屆既申請表, 聽朝就會再去入紙。想唔到，最不可思義既事情，就係聽日發生了...

網上郵購

暑假差不多完了，樹熊BB們為左要好好利用呢個最後機會，決定要再去中央池塘野餐多一次。其實，暑假對佢地黎講, 一啲都唔重要。反正佢地最大都係得一歲, 根本都唔使番學。
上個星期日，大清早熊爸爸就準備好一齊，帶佢地去野餐了。由於樹熊媽媽要去一個朋友BB既百日party，所以佢就無一齊去中央池塘。去完party之後，番到屋企，見一個人都無，樹熊媽媽就百無聊賴咁上下網。睇下呢樣，睇下果樣。無意中比佢見到一個叫做"塘鵝網站"既郵購網站，樹熊媽媽比裡面既內容吸引住，睇左好耐，連熊爸爸同啲BB番左屋企都唔知道。
熊爸爸見到樹熊媽媽好尊心咁望住部電腦，就走去抱抱樹熊媽媽。樹熊媽媽一見到熊爸爸番左黎，就好開心好興奮咁同熊爸爸講，佢話 "熊爸爸! 熊爸爸! 你知唔知我今日做左乜野啊? 我係網上面訂購左一個........" 佢一句話都未講完，所有既樹熊BB已經一齊湧上前攬到樹熊媽媽實一實。七嘴八舌咁係度講佢地今日做左乜野，玩左乜野，食左乜野...
樹熊媽媽見啲BB個個都玩到污糟邋遢，就一次過放晒佢地入洗衣機沖涼，跟住又要幫佢地乾身。結果搞左幾個鐘頭先搞掂晒，搞完之後，啲BB都已經眼訓得好緊要，全部上晒樹熊媽媽張床要媽媽講故事，不過，媽媽都未開始講，佢地都已經訓晒囉。
樹熊媽媽見啲BB訓晒，熊爸爸又訓埋，佢就又去訓覺囉。不過，樹熊媽媽成晚都訓唔著，不斷都係度諗緊佢今日上網郵購左既野...

失眠的樹熊媽媽 II

樹熊媽媽失眠左兩晚，本來應該可以好好咁攬番住阿啤訓番一覺好架啦。點知，一覺訓醒既時候，啲BB發現尋晚樹熊媽媽原來無攬住阿啤喎。結果都係訓得唔好，仲係嬲爆爆咁樣。嚇到啲樹熊BB要再開大會研究下點解。
大家傾左好耐都諗唔到點解會咁，最後，佢地決定派最有膽色，最唔怕死同埋其實係最笨笨果個勞蘇去試探下媽媽既口風。勞蘇係一個走成熟路線既樹熊BB，雖然佢同Goofy一樣都係得兩歲，但係就比Goofy穩重得多了。佢走到去樹熊媽媽既身邊坐底，懶係關心樹熊媽媽咁，係度問樹熊媽媽點解尋晚唔攬住阿啤訓。原來係因為尋日阿啤沖完涼，乾左身之後，無晒樹熊媽媽既香味，得番啲衣物柔順濟既氣味，樹熊媽媽唔鍾意，所以就唔攬住佢訓囉。
樹熊BB明白到問題出黎邊度了，佢地立即採取應變措施。大家一齊壓住阿啤係張床上面，不停咁用自己既身體磨擦阿啤，等佢地身上既樹熊媽媽味可以過左去阿啤既身上。　終於，係佢地既努力之下，阿啤回復番以住所擁有既樹熊媽媽香味囉
阿啤好開心咁走去樹熊媽媽度攬住佢。而樹熊媽媽再次咁聞到熟識既氣味，咁佢就好肉緊咁攬番住阿啤再番去訓覺了。最後，樹熊媽媽終於可以訓番覺好既，而啲樹熊BB唔使再怕樹熊媽媽嬲熳爆，佢地可以放心咁去頑皮囉。

失眠的樹熊媽媽

樹熊皇宮進入了緊急狀態已經兩天了。樹熊BB們全部都好緊張，乖乖地咁唔多敢出聲，又唔敢出去玩。連熊爸爸都唔敢亂黎，只係坐係度睇佢最鍾意既財經報紙。原來樹熊媽媽失眠左兩晚，心情好差，所以大家都唔敢激嬲佢。
大家估下樹熊媽媽點解會失眠呢？樹熊媽媽係有攬住阿啤訓覺既習慣既。每晚上床錫完Goofy之後，就要攬住阿啤先訓得著，因為阿啤係咁多樹熊BB入面最大份最好攬果一個。兩日前，阿啤同啲兄弟玩既時候，玩到好污糟，比樹熊媽媽掉左佢入洗衣機洗白白。本來，洗乾淨就無事架啦。但係，由於阿啤身型真係太龐大啦，乾左兩晚都未乾得晒。搞到樹熊媽媽兩晚都無得攬住，無覺好訓。
啲樹熊BB好擔心，怕樹熊媽媽咁樣失眠落去會唔靚靚，（其實係怕樹熊媽媽發脾氣先真，不過呢句唔講得架！！），所以呢佢地就一齊進行左樹熊王國有史以來最大既救援行動。　目的係要用最快既時間整番乾阿啤，等樹熊媽媽今晚有覺好訓。
行動係由樹熊Pooh策劃，Goofy指揮，其他樹熊BB全力配合。首先係比較大力既樹熊BB一齊放阿啤上抽濕機上面乾一陣，好似上次樹熊Pooh咁。跟住就由細隻啲既樹熊BB搵左樹熊媽媽個風筒出黎，全速咁吹乾阿啤。係阿啤比佢地乾緊既時候，啲無野做既樹熊BB就一齊圍住佢望住佢支持佢。
係樹熊BB既努力之下，阿啤趕得切係樹熊媽媽訓覺前乾番晒啦！終於，今晚樹熊媽媽可以錫錫Goofy然後攬住阿啤訓番覺好囉。而啲樹熊BB亦可以繼續開開心心咁去玩了

細細Pooh身世之迷

有一日，成班樹熊BB係屋企陪住樹熊媽媽睇電視。電視正播緊一個日本既旅遊節目。當節目介紹到大板心齋橋既時候，細細Pooh好興奮咁攬住樹熊媽媽，佢話，"媽媽, 媽媽, 我認得呢度啊!! 細細Pooh係呢度出世架!!" 原來呢，當日樹熊媽媽去日本玩既時候，就係喺心齋橋帶細細Pooh番屋企啦。所以，細細Pooh除左有樹熊王國既passport之外，仲有日本國藉。同埋, 由於佢身型細粒，方便攜帶，通常樹熊媽媽出國旅遊都會帶埋佢。所以佢就見多識廣，仲會講多國語言添。
一直以黎，細細Pooh都好自豪自己係咁多樹熊BB入面見得世面最多果個。每逄有乜野同外國有關係問題，細細Pooh都會義不容辭咁自動請纓，幫啲兄弟解答既。而啲兄弟亦都好佩服細細Pooh既知識，所以都好樂意比佢負責一切外國既問題。
點不知，今日竟然比Goofy發現到一個天大既秘密。當細細Pooh好興奮咁攬住樹熊媽媽既時候， 坐係樹熊媽媽旁邊既Goofy無意中睇到細細Pooh既屁股度果張出世紙。上面竟然係寫住"Made in China"喎。
Goofy覺得好奇怪，仲係度諗，唔通呢個細佬唔係當日樹熊媽媽帶番黎果個，而係比人掉左包?  為左求証，佢就趁無人既時候，靜靜雞走左去將佢既發現話比樹熊媽媽知。本來佢係諗住樹熊媽媽聽到呢件事之後一定會好震驚既，點知樹熊媽媽一啲驚訝既反應都無。原來佢一早就知道囉。佢仲笑住咁解釋比Goofy聽，佢話，"Goofy笨笨，今時今日大部份日本出世既BB其實都係Made in China架. 媽媽帶細細Pooh番黎既時候已經知道囉，不過見細細Pooh咁自豪自己係日本Pooh，我咪無話比佢知之嘛。

Goofy聽完之後，覺得自己真係有少少笨笨，不過佢又覺得好似係細細Pooh笨笨多啲先真喎，所以佢就同樹熊媽媽講，話等佢將個真相講比細細Pooh知啦。係佢未有所行動之前，就已經比樹熊媽媽捉實左囉. 樹熊媽媽同Goofy講，佢話 "Goofy乖, 呢句唔講得比細細Pooh知架。如果佢知道左，就會好唔開心架啦。所以Goofy要答應媽媽，呢件事係我地既小秘密，千祈唔可以同人講。
Goofy咁聽樹熊媽媽話，自然會答應媽媽啦，所以，你地都要幫幫手，記住有兩樣野係唔講得架!!  第一就係唔可以同Goofy講佢得一隻牙，第二就係唔可以比細細Pooh知道佢原來係Made in China架。

中央池塘

今日，樹熊王國風和日麗，係郊遊既好日子。可惜樹熊媽媽同熊爸爸都有要事在身，抽唔到時間出黎陪啲樹熊BB去玩。食過早餐之後，佢地就各自出左去做野囉，臨走前，仲話要到晚飯時間先會番黎，叫啲樹熊BB要乖乖地咁留係屋企添。

最貪玩而又天不怕地不怕既細細Goofy同細細Pooh一聽到爸爸媽媽話成日都唔會係屋企，自然有好多鬼主意啦。　最後，佢地都說服到Goofy偷偷地帶佢地同其他樹熊BB一齊去野餐游水。

Goofy同成班兄弟一行九個BB，由樹熊皇宮落左山之後，一直沿住森林大道往南行，行左一陣就見到中央池塘出現係眼前啦。中央池塘係樹熊王國既正中心位置。四條森林大道由果度開始，向住東南西北四個方向伸展出去，直達王國既四邊。池塘旁邊仲有一塊好大既草地，係平時用黎舉行特別活動既熱門地點。班小朋友好開心咁係中央池塘玩水，同埋係草地上面野餐添。

係大家都玩到樂而忘返既時候，樹熊Pooh提醒大家係時候要番屋企了，如果唔係就會被樹熊媽媽發現佢地偷走出黎玩。於是，佢地就拿拿臨執晒所有野，以最快既速度趕番樹熊皇宮去 囉。趕番去真係唔係問題，問題係佢地要係媽媽番到屋企之前整番乾晒個身，唔係一定穿煲。最有效既方法，當然係跳入乾衣機啦。

於是，Goofy就叫啲樹熊BB一個跟一個咁走入部乾衣機入面，當最後連自己都入埋去之後，樹熊Pooh就開機了。一切順利既話，一個鐘頭左右就會乾晒。　到樹熊媽媽番到黎，都唔會知到佢地出去玩過囉。

正當樹熊Pooh好滿意呢個計劃既時候，佢突然發現，自己為左要開動部乾衣機，所以留左係部機外面。 好彩, 樹熊Pooh諗到辦法，立即開左部油濕機，自己跳左上去上面, 等部機抽番乾自己。

過左大約一個鐘頭，樹熊Pooh就打開部乾衣機等D已經乾晒既樹熊BB出番黎。不過佢自己就因為只係靠部抽濕機, 所以只係乾得七成。而係呢個時候，樹熊媽媽番到黎啦!

Goofy一見到樹熊媽媽，立即上前攬住佢，不停咁錫錫佢。同時，其他BB好醒目咁圍上去分散媽媽既注意力，等樹熊Pooh可以靜靜雞咁爬入部乾衣機度，關埋度門。Goofy就趁樹熊媽媽去沖涼時，偷偷地去開左部乾衣機。當樹熊媽媽沖完涼出黎時，樹熊Pooh已經乾晒咁坐左係梳化上面同其他樹熊BB一齊睇緊電視，神不知鬼不覺咁過左呢關啦...

樹熊王國

係一個好遙遠好遙遠既地方，有一個好和平好靚既森林王國。王國裡面既每一個子民都過住幸褔快樂既生活。呢個王國既國皇係一隻可愛少少，但係又有型少少既熊。而佢既皇后，就係人見人愛，來自南方既樹熊公主。　雖然熊先係王國既主人，但係由於樹熊公主比熊大王更加受到所有王國子民既愛戴，所以呢個森林王國好自然咁就被稱為樹熊王國了。（真正既原因當然係因為樹熊公主先係呢個森林王國真正既幕後話事人啦！不過呢句唔講得架，因為森林大王熊係唔知架。）

森林大王熊同埋樹熊公主係住係森林北面一個小山上既樹熊皇宮入面。除左佢地兩個之外，仲有佢地一班性格不同但係卻同樣可愛既BB啦。而其中最得樹熊公主疼錫，亦係我地故事既主角之一既就係Goofy啦。

點解Goofy會最得樹熊公主歡心呢？除左因為Goofy擁有精靈可愛既樣子同埋活潑開朗既性格之外，最主要既都係因為Goofy最識得逗樹熊公主開心。佢除左每晚必定會係樹熊公主旁邊陪住佢訓覺**之外，仲會時時刻刻咁作好準備，等樹熊公主一叫佢，佢就會飛身撲向樹熊公主錫錫媽媽，每次都會令到樹熊公主笑得好開心既。所以話呢，樹熊公主咁錫Goofy絕對係同佢得一隻牙無關既。（呢句都唔講得架，Goofy聽到會唔開心架!)
幸褔樹熊BB歷險記就係由Goofy錫錫媽媽開始架啦。
** 唔使問啦，呢個係小朋友既童話故事黎架嘛，所以樹熊媽媽身邊梗係有樹熊BB陪住訓架啦。熊爸爸通常都無份架。